מקור דברי הימים ב ל״א
1 וּכְכַלּ֣וֹת כׇּל־זֹ֗את יָצְא֨וּ כׇל־יִשְׂרָאֵ֥ל הַֽנִּמְצְאִים֮ לְעָרֵ֣י יְהוּדָה֒ וַיְשַׁבְּר֣וּ הַמַּצֵּב֣וֹת וַיְגַדְּע֣וּ הָאֲשֵׁרִ֡ים וַיְנַתְּצ֣וּ אֶת־הַ֠בָּמ֠וֹת וְאֶת־הַֽמִּזְבְּח֞וֹת מִכׇּל־יְהוּדָ֧ה וּבִנְיָמִ֛ן וּבְאֶפְרַ֥יִם וּמְנַשֶּׁ֖ה עַד־לְכַלֵּ֑ה וַיָּשׁ֜וּבוּ כׇּל־בְּנֵ֧י יִשְׂרָאֵ֛ל אִ֥ישׁ לַאֲחֻזָּת֖וֹ לְעָרֵיהֶֽם׃ פ
2 וַיַּעֲמֵ֣ד יְחִזְקִיָּ֡הוּ אֶת־מַחְלְק֣וֹת הַכֹּהֲנִ֣ים וְ֠הַלְוִיִּ֠ם עַֽל־מַחְלְקוֹתָ֞ם אִ֣ישׁ כְּפִ֣י עֲבֹדָת֗וֹ לַכֹּֽהֲנִים֙ וְלַלְוִיִּ֔ם לְעֹלָ֖ה וְלִשְׁלָמִ֑ים לְשָׁרֵת֙ וּלְהֹד֣וֹת וּלְהַלֵּ֔ל בְּשַׁעֲרֵ֖י מַחֲנ֥וֹת יְהֹוָֽה׃ ס
3 וּמְנָת֩ הַמֶּ֨לֶךְ מִן־רְכוּשׁ֜וֹ לָעֹל֗וֹת לְעֹלוֹת֙ הַבֹּ֣קֶר וְהָעֶ֔רֶב וְהָ֣עֹל֔וֹת לַשַּׁבָּת֖וֹת וְלֶחֳדָשִׁ֣ים וְלַמֹּעֲדִ֑ים כַּכָּת֖וּב בְּתוֹרַ֥ת יְהֹוָֽה׃
4 וַיֹּ֤אמֶר לָעָם֙ לְיוֹשְׁבֵ֣י יְרוּשָׁלַ֔͏ִם לָתֵ֕ת מְנָ֥ת הַכֹּהֲנִ֖ים וְהַלְוִיִּ֑ם לְמַ֥עַן יֶחֶזְק֖וּ בְּתוֹרַ֥ת יְהֹוָֽה׃
5 וְכִפְרֹ֣ץ הַדָּבָ֗ר הִרְבּ֤וּ בְנֵֽי־יִשְׂרָאֵל֙ רֵאשִׁ֣ית דָּגָ֗ן תִּיר֤וֹשׁ וְיִצְהָר֙ וּדְבַ֔שׁ וְכֹ֖ל תְּבוּאַ֣ת שָׂדֶ֑ה וּמַעְשַׂ֥ר הַכֹּ֛ל לָרֹ֖ב הֵבִֽיאוּ׃
6 וּבְנֵ֧י יִשְׂרָאֵ֣ל וִיהוּדָ֗ה הַיּוֹשְׁבִים֮ בְּעָרֵ֣י יְהוּדָה֒ גַּם־הֵ֗ם מַעְשַׂ֤ר בָּקָר֙ וָצֹ֔אן וּמַעְשַׂ֣ר קׇֽדָשִׁ֔ים הַמְקֻדָּשִׁ֖ים לַיהֹוָ֣ה אֱלֹהֵיהֶ֑ם הֵבִ֕יאוּ וַֽיִּתְּנ֖וּ עֲרֵמ֥וֹת עֲרֵמֽוֹת׃ ס
7 בַּחֹ֙דֶשׁ֙ הַשְּׁלִשִׁ֔י הֵחֵ֥לּוּ הָעֲרֵמ֖וֹת לְיִסּ֑וֹד וּבַחֹ֥דֶשׁ הַשְּׁבִיעִ֖י כִּלּֽוּ׃ ס
8 וַיָּבֹ֙אוּ֙ יְחִזְקִיָּ֣הוּ וְהַשָּׂרִ֔ים וַיִּרְא֖וּ אֶת־הָעֲרֵמ֑וֹת וַֽיְבָרְכוּ֙ אֶת־יְהֹוָ֔ה וְאֵ֖ת עַמּ֥וֹ יִשְׂרָאֵֽל׃ פ
9 וַיִּדְרֹ֣שׁ יְחִזְקִיָּ֗הוּ עַל־הַכֹּ֥הֲנִ֛ים וְהַלְוִיִּ֖ם עַל־הָעֲרֵמֽוֹת׃
10 וַיֹּ֣אמֶר אֵלָ֗יו עֲזַרְיָ֧הוּ הַכֹּהֵ֛ן הָרֹ֖אשׁ לְבֵ֣ית צָד֑וֹק וַ֠יֹּ֠אמֶר מֵהָחֵ֨ל הַתְּרוּמָ֜ה לָבִ֣יא בֵית־יְהֹוָ֗ה אָכ֨וֹל וְשָׂב֤וֹעַ וְהוֹתֵר֙ עַד־לָר֔וֹב כִּ֤י יְהֹוָה֙ בֵּרַ֣ךְ אֶת־עַמּ֔וֹ וְהַנּוֹתָ֖ר אֶת־הֶהָמ֥וֹן הַזֶּֽה׃ ס
11 וַיֹּ֣אמֶר יְחִזְקִיָּ֗הוּ לְהָכִ֧ין לְשָׁכ֛וֹת בְּבֵ֥ית יְהֹוָ֖ה וַיָּכִֽינוּ׃
12 וַיָּבִ֨יאוּ אֶת־הַתְּרוּמָ֧ה וְהַֽמַּעֲשֵׂ֛ר וְהַקֳּדָשִׁ֖ים בֶּאֱמוּנָ֑ה וַעֲלֵיהֶ֤ם נָגִיד֙ כונניהו כׇּֽנַנְיָ֣הוּ הַלֵּוִ֔י וְשִׁמְעִ֥י אָחִ֖יהוּ מִשְׁנֶֽה׃
13 וִיחִיאֵ֡ל וַ֠עֲזַזְיָ֠הוּ וְנַ֨חַת וַעֲשָׂהאֵ֜ל וִירִימ֤וֹת וְיֽוֹזָבָד֙ וֶאֱלִיאֵ֣ל וְיִסְמַכְיָ֔הוּ וּמַ֖חַת וּבְנָיָ֑הוּ פְּקִידִ֗ים מִיַּ֤ד כונניהו כׇּֽנַנְיָ֙הוּ֙ וְשִׁמְעִ֣י אָחִ֔יו בְּמִפְקַד֙ יְחִזְקִיָּ֣הוּ הַמֶּ֔לֶךְ וַעֲזַרְיָ֖הוּ נְגִ֥יד בֵּית־הָאֱלֹהִֽים׃
14 וְקוֹרֵ֨א בֶן־יִמְנָ֤ה הַלֵּוִי֙ הַשּׁוֹעֵ֣ר לַמִּזְרָ֔חָה עַ֖ל נִדְב֣וֹת הָאֱלֹהִ֑ים לָתֵת֙ תְּרוּמַ֣ת יְהֹוָ֔ה וְקׇדְשֵׁ֖י הַקֳּדָשִֽׁים׃
15 וְעַל־יָד֡וֹ עֵ֣דֶן וּ֠מִנְיָמִ֠ן וְיֵשׁ֨וּעַ וּֽשְׁמַעְיָ֜הוּ אֲמַרְיָ֧הוּ וּשְׁכַנְיָ֛הוּ בְּעָרֵ֥י הַכֹּהֲנִ֖ים בֶּאֱמוּנָ֑ה לָתֵ֤ת לַֽאֲחֵיהֶם֙ בְּמַחְלְק֔וֹת כַּגָּד֖וֹל כַּקָּטָֽן׃
16 מִלְּבַ֞ד הִתְיַחְשָׂ֣ם לִזְכָרִ֗ים מִבֶּ֨ן שָׁל֤וֹשׁ שָׁנִים֙ וּלְמַ֔עְלָה לְכׇל־הַבָּ֥א לְבֵית־יְהֹוָ֖ה לִדְבַר־י֣וֹם בְּיוֹמ֑וֹ לַעֲב֣וֹדָתָ֔ם בְּמִשְׁמְרוֹתָ֖ם כְּמַחְלְקוֹתֵיהֶֽם׃
17 וְאֵ֨ת הִתְיַחֵ֤שׂ הַכֹּֽהֲנִים֙ לְבֵ֣ית אֲבוֹתֵיהֶ֔ם וְהַ֨לְוִיִּ֔ם מִבֶּ֛ן עֶשְׂרִ֥ים שָׁנָ֖ה וּלְמָ֑עְלָה בְּמִשְׁמְרוֹתֵיהֶ֖ם בְּמַחְלְקוֹתֵיהֶֽם׃
18 וּלְהִתְיַחֵ֗שׂ בְּכׇל־טַפָּ֛ם נְשֵׁיהֶ֛ם וּבְנֵיהֶ֥ם וּבְנוֹתֵיהֶ֖ם לְכׇל־קָהָ֑ל כִּ֥י בֶאֱמוּנָתָ֖ם יִתְקַדְּשׁוּ־קֹֽדֶשׁ׃
19 וְלִבְנֵי֩ אַהֲרֹ֨ן הַכֹּהֲנִ֜ים בִּשְׂדֵ֨י מִגְרַ֤שׁ עָֽרֵיהֶם֙ בְּכׇל־עִ֣יר וָעִ֔יר אֲנָשִׁ֕ים אֲשֶׁ֥ר נִקְּב֖וּ בְּשֵׁמ֑וֹת לָתֵ֣ת מָנ֗וֹת לְכׇל־זָכָר֙ בַּכֹּ֣הֲנִ֔ים וּלְכׇל־הִתְיַחֵ֖שׂ בַּלְוִיִּֽם׃
20 וַיַּ֧עַשׂ כָּזֹ֛את יְחִזְקִיָּ֖הוּ בְּכׇל־יְהוּדָ֑ה וַיַּ֨עַשׂ הַטּ֤וֹב וְהַיָּשָׁר֙ וְהָ֣אֱמֶ֔ת לִפְנֵ֖י יְהֹוָ֥ה אֱלֹהָֽיו׃
21 וּבְכׇֽל־מַעֲשֶׂ֞ה אֲשֶׁר־הֵחֵ֣ל בַּעֲבוֹדַ֣ת בֵּית־הָאֱלֹהִ֗ים וּבַתּוֹרָה֙ וּבַמִּצְוָ֔ה לִדְרֹ֖שׁ לֵאלֹהָ֑יו בְּכׇל־לְבָב֥וֹ עָשָׂ֖ה וְהִצְלִֽיחַ׃ פ
פירוש רש"י על דברי הימים ב ל״א
1 אִישׁ כְּפִי עֲבוֹדָתוֹ. הַכֹּהֲנִים לְשָׁרֵת, וְהַלְוִיִּם לִהְיוֹת מְשׁוֹרְרִים וְשׁוֹעֲרִים, וְכָל אִישׁ וָאִישׁ עַל עֲבוֹדָתוֹ הַנְּכוֹנָה:
2 וּמְנָת הַמֶּלֶךְ מִן רְכוּשׁוֹ לָעֹלוֹת וְגוֹ׳. אֲשֶׁר נָתַן לַעֲשׂוֹת אוֹתָם בְּרָָצוֹן:
3 וַיֹּאמֶר לָעָם לְיוֹשְׁבֵי יְרוּשָׁלִַם וְגוֹ׳ לְמַעַן יֶחֶזְקוּ בְּתוֹרַת ה׳. יוֹתֵר בְּרָצוֹן; וְעוֹד, בְּעוֹד שֶׁיְּהֵא לָהֶם פַּרְנָסָתָם מְזֻמֶּנֶת, יוּכְלוּ לַעֲשׂוֹת וְלַעֲסֹק בְּתוֹרַת ה׳; לְפִי שֶׁלֹּא נִתְּנָה הַתּוֹרָה אֶלָּא לְאוֹכְלֵי הַמָּן מכילתא בשלח ויהי פתיחתא, וּשְׁנִיִּים לָהֶם אוֹכְלֵי תְּרוּמָה:
4 וְכִפְרֹץ הַדָּבָר. מִפִּי הַמֶּלֶךְ, לָתֵת מְנָת לַכֹּהֲנִים וְהַלְוִיִּם, הִרְבּוּ בְנֵי יִשְׂרָאֵל רֵאשִׁית דָּגָן תִּירוֹשׁ וְיִצְהָר וּדְבַשׁ, דְּבַשׁ תְּמָרִים:
5 וְכָל תְּבוּאַת שָׂדֶה. וְכָל אֵלּוּ לֹא מִתְּבוּאַת הַשָּׂדֶה הֵם, אֶלָּא כָּךְ מְפֹרָשׁ בְּמַסֶּכֶת נְדָרִים בְּפֶרֶק הַנּוֹדֵר מִן הַיָּרָק נדרים נד.: הַנּוֹדֵר מִן הַיָּרָק מֻתָּר בִּדְלוּעִים; מְתִיב רַב יוֹסֵף: וְכִפְרֹץ הַדָּבָר הִרְבּוּ בְנֵי יִשְׂרָאֵל וְגוֹ׳, וְאִי אָמְרַתְּ דָּגָן – כָּל דְּמִדְגַּן מַשְׁמַע, מַאי וְכִפְרֹץ וְגוֹמֵר? אָמַר אַבַּיֵּי: לְאָתוֹיֵי פֵּירוֹת הָאִילָן וְיָרָק, עַד אָמַר רָבָא: תְּבוּאָה לְחוּד וּתְבוּאַת שָׂדֶה לְחוּד:
6 וּמַעְשַׂר קָדָשִׁים הַמְקֻדָּשִׁים לַה׳. הַמַּעֲשֵׂר מִן הַמַּעֲשֵׂר שֶׁהַלְוִיִּם נוֹתְנִים לַכֹּהֲנִים במדבר יח:כה-כו:
7 וַיִּתְּנוּ עֲרֵמוֹת עֲרֵמוֹת. הוֹיְ״פִין בִּלְשׁוֹן אַשְׁכְּנַז, דֻּגְמָא: ״עֲרֵמַת חִטִּים״ שיר השירים ז:ג:
8 הֵחֵלּוּ הָעֲרֵמוֹת לְיִסּוֹד. כִּי תְּחִלַּת דָּבָר נִקְרָא יְסוֹד, כְּמוֹ יְסוֹד הַבַּיִת שֶׁהוּא רֹאשׁ לְבִנְיָן, וְדוֹמֶה לוֹ ״הוּא יְסֻד הַמַּעֲלָה וְגוֹמֵר״ עזרא ז:ט:
9 וַיְבָרְכוּ אֶת ה׳. שֶׁנָּתַן בְּלֵב יִשְׂרָאֵל לְהַפְרִישׁ תְּרוּמוֹתֵיהֶם וּמַעַשְׂרוֹתֵיהֶם:
10 וַיִּדְרֹשׁ יְחִזְקִיָּהוּ. לְפִי שֶׁרָאָה חִזְקִיָּהוּ הָעֲרֵמוֹת גְּדוֹלוֹת, אָמַר בְּלִבּוֹ: שֶׁמָּא לֹא לָקְחוּ הַכֹּהֲנִים וְהַלְוִיִּם מֵהֶם וְלֹא נָגְעוּ בָּהֶם? שֶׁאִם נָגְעוּ בָּהֶם, אֵיךְ נִתְרַבּוּ כָּל כָּךְ? וְתָמַהּ וְדָרַשׁ מֵהֶם עַל דְּבַר הָעֲרֵמוֹת עַל מָה זֶה:
11 וַיֹּאמֶר אֵלָיו עֲזַרְיָהוּ. הוּא הָיָה בִּימֵי עֻזִּיָּהוּ דברי הימים ב כו:כ:
12 מֵהָחֵל הַתְּרוּמָה לָבִיא. אָכַלְנוּ אָכוֹל, וְלֹא אֲכִילַת עֲרַאי אֶלָּא אָכוֹל וְשָׂבוֹעַ וְהוֹתֵר; וּמַה שֶּׁאַתָּה מִתְמֵהַּ עַל שֶׁאָכַלְנוּ אַרְבָּעָה חֳדָשִׁים וְאַף עַל פִּי כֵן עֲרֵמוֹתֵיהֶם כָּל כָּךְ גְּדוֹלוֹת – זֶה הַדָּבָר, כִּי בֵּרַךְ ה׳ אֶת עַמּוֹ וְנָתַן לָהֶם תְּבוּאוֹת הַרְבֵּה, לְפִיכָךְ הִרְבָּה הַתְּרוּמוֹת וְהַמַּעַשְׂרוֹת שֶׁלָּנוּ:
13 וְהַנּוֹתָר. מִן אֲכִילָתֵנוּ זֶה:
14 הֶהָמוֹן הַזֶּה. אֲשֶׁר אַתָּה רוֹאֶה עֲרֵמוֹת עֲרֵמוֹת:
15 לְהָכִין לְשָׁכוֹת בְּבֵית ה׳. וְלָשׂוּם בָּהֶם הַתְּרוּמוֹת:
16 וְאֵת הִתְיַחֵשׂ הַכֹּהֲנִים לְבֵית אֲבוֹתֵיהֶם וְהַלְוִיִּם. עִם יִחוּס טַפָּם, נְשֵׁיהֶם, בְּנֵיהֶם וּבְנוֹתֵיהֶם, לְכָל אוֹתוֹ קָהָל הָיוּ מַסְפִּיקִין מְזוֹנוֹתֵיהֶם מֵהַתְּרוּמוֹת וּמַעַשְׂרוֹת הַקֹּדֶשׁ. וְהַתְּרוּמוֹת וְהַמַּעַשְׂרוֹת, כָּל אֵלּוּ שֶׁאָמַרְנוּ – לְאוֹתָן הָעוֹמְדִים לְשָׁרֵת בָּעֲזָרָה, וְגַם לִבְנֵי אַהֲרֹן הַכֹּהֲנִים שֶׁלֹּא הִגִּיעַ מִשְׁמְרוֹתָם לְשָׁרֵת, וְהֵם בִּשְׂדֵה מִגְרַשׁ עָרֵיהֶם בְּכָל עִיר וָעִיר:
17 אֲנָשִׁים אֲשֶׁר נִקְּבוּ בְשֵׁמוֹת. לְמַעְלָה יב-יג כְּנַנְיָהוּ וְאֶחָיו הָיוּ מְמֻנִּים עֲלֵיהֶם לְקַבֵּל הַמָּנוֹת הַתְּרוּמוֹת וְהַמַּעַשְׂרוֹת מֵאֵת יִשְׂרָאֵל, לָתֵת הַמָּנוֹת לְכָל זָכָר בַּכֹּהֲנִים וּלְוִיִּם:
18 לְכָל זָכָר בַּכֹּהֲנִים. וְגַם לְכָל נְשֵׁיהֶם, בְּנֵיהֶם וּבְנוֹתֵיהֶם לעיל, יח; וּמַה שֶּׁאָמַר כָּאן לְכָל זָכָר – מִשּׁוּם רְבוּתָא, שֶׁאֲפִלּוּ לִזְכָרִים קְטַנִּים הָיוּ מַסְפִּיקִין, כִּדְלְעֵיל לִזְכָרִים מִבֶּן שָׁלֹשׁ וָמַעְלָה, וְכָל שֶׁכֵּן שֶׁהָיוּ מַסְפִּיקִין לִנְשֵׁיהֶם וְלִבְנֵיהֶם וְלִבְנוֹתֵיהֶם: